سەرۆكایەتیی كۆماری سووریا ناوەڕۆكی لێكتێگەیشتنێكی هاوبەشی لەگەڵ هێزەكانی سووریای دیموكرات (هەسەدە) ئاشكرا كرد سەبارەت بە ئایندەی حەسەكە. بە گوێرەی ڕاگەیەندراوی سەرۆكایەتی سووریا: بڕیاردراوە لە كاتژمێر 8:00ی شەوى رابردوەوە ئاگربەست جێبەجێ بكرێت و چوار ڕۆژ مۆڵەت بە هەسەدە دەدرێت بۆ دانانی پلانی یەكخستنەوەی ناوچەكان. بەگوێرەی ڕێككەوتنەكە، هێزەكانی سوپای سووریا ناچنە نێو سەنتەری شارەكانی حەسەكە و قامیشلۆ و گوندە كوردییەكان، بەڵكو تەنها لە دەوروبەری شارەكان جێگیر دەبن و ئاسایشی گوندەكان بە هێزی ناوخۆیی دەسپێردرێت. هاوكات رێككەوتن كراوە لەسەر یەكخستنی تەواوی هێزە سەربازی و ئەمنییەكانی هەسەدە لە چوارچێوەی وەزارەتەكانی بەرگری و ناوخۆی سووریادا. لە بەشێكی دیكەی لێكتێگەیشتنەكەدا هاتووە، مەزڵوم عەبدی، فەرماندەی هەسەدە دەسەڵاتی پێدەدرێت كاندید بۆ پۆستی یاریدەدەری وەزیری بەرگری و پارێزگاری حەسەكە و نوێنەرانی پەرلەمان دیاری بكات، هەروەها لیستی ناوی كارمەندانیش بۆ دامەزراندن لە دامودەزگاكانی دەوڵەت ئامادە دەكات، بۆ ئەوەی دواتر گفتوگۆ لەسەر وردەكارییەكانی یەكخستنەوەی ئاشتیانەی پارێزگای حەسەكە دەستپێبكات.
لە رۆژاواى كوردستان ئاگربەست جێبەجێ دەكرێت و تا چوار ڕۆژ بەردەوام دەبێت
Byنوسەر
کانوونی دووەم 23, 2026