ئاوارە حمزە حسین
ژیانی ڕۆژانەی هاوڵاتی لە هەرێمی کوردستان بەستراوەتەوە بە چاوەڕوانییەکی بێکۆتایی بۆ گەیشتن بە سەرەتاییترین پێداویستییەکانی گوزەران؛ لە کاتژمێرەکانی هاتنەوەی کارەبا، شێوازی دابەشکردنی مووچە، نۆژەنکردنەوەی شەقامەکان، و دۆزینەوەی دەرفەتێکی کار بۆ گەنجان.
لە بەرامبەر ئەم هەموو فشار و ماندووبوونەدا، تەواوی کێشە چارەنووسساز و نیشتمانییەکان کورتکراونەتەوە بۆ بازنەیەکی داخراو لە ململانێی نێوان دوو پارتی باڵادەست؛ بە جۆرێک کە هەر پرسێکی ئابووری، یاسایی، یان کارگێڕی ڕاستەوخۆ دەبێتە شەڕێکی نوێ لە نێوان پارتی و یەکێتیدا.
لە کاتی هەر گرژی و ئاڵۆزییەکدا، هاوڵاتییان دەخرێنە دۆخی چاوەڕوانییەوە تا وەفدە حزبییەکان کۆبوونەوەکانیان ئەنجام بدەن، کەچی ئەم ڕکابەرییە سیاسییە لەبری ئەوەی خزمەت بە گەشەپێدان بکات، بووەتە هۆی ئیفلیجکردنی دامەزراوە فەرمییەکان؛ دۆخەکە گەیشتووەتە ئەو ئاستەی کە: «پارتی پەنجەی تۆمەت بۆ یەکێتی ڕادەکێشێت، یەکێتی پەنجەی تۆمەت بۆ پارتی ڕادەکێشێت، بەڵام هاوڵاتییەکی ماندوو دەپرسێت: دەکرێت کەسێک لە ئێوە وشەی کارەبا، مووچە، ڕێگاوبان، و هەلی کار بەکاربهێنێت؟»
سیستەمێکی حوکمڕانی ناتوانێت خۆی بە سیستەمێکی فرەیی یان ڕکابەریی تەندروست ناو ببات، کاتێک تەواوی ململانێکەی تەنیا شەڕکردنی دوو هێز بێت لەسەر دابەشکردنی هەژموون و بەڕێوەبردنی هەمان ئەو دامەزراوانەی کە بە دەستی خۆیان پەکیان خستوون.