سەرۆكی ئەمریكا پێگەیشتنی پێشنیازەكەی ئێرانی ڕاگەیاند و وتی: لە نێوان واژووكردنی ڕێككەوتنێكی نوێ لەگەڵ ئێران، یان وەشاندنی گورزێكی سەربازیی بەهێز بۆ سەر ئەو وڵاتەدا دوودڵە. لە لێدوانێكیدا بۆ ماڵپەڕی “ئەكسیۆس”ی وڵاتەكەی، دۆناڵد ترەمپ، سەرۆكی ئەمریكا ئاشكرای كرد “50% لەگەڵ ڕێككەوتنە و 50%یش لەگەڵ هێرشكردنە سەر ئێراندایە”. ترەمپ هۆشدارییەكی توندی دا و وتی: “یان واژووی ڕێككەوتن دەكەین، یان بە توندی لێیان دەدەین”. ئاماژەی بەوەش كرد “تەنیا ئەو ڕێككەوتنە قبوڵ دەكات كە پرسی پیتاندنی یۆرانیۆم و چارەنووسی كۆگاكانی ئێران چارەسەر بكات و ڕێگریی تەواو لە دەستڕاگەیشتن بە چەكی ئەتۆمی لە ئێران بگرێت”. سەرۆكی ئەمریكا بەدەستگەیشتنی پێشنیازە نوێیەكەی ئێرانی بۆ ڕێككەوتن ئاشكرا كرد و وتیشی: ئەمڕۆ كۆبوونەوەی ڕاوێژكارە باڵاكان دەربارەی دوا ڕەشنووسی ڕێككەوتنەكە ئەنجام دەدەین، ڕەنگە سبەی بڕیاری كۆتایی بدرێت و ئێستا تاوتوێی میكانیزمێك دەكەین بۆ كردنەوەی گەرووی هورمز و ئازادكردنی بەشێك لە داراییە بلۆككراوەكانی ئێران لە بەرامبەر جێبەجێكردنی مەرجەكانی ئەمریكادا. وتیشی: ناتوانێت میدیاكان لە ئەنجامەكە ئاگادار بكاتەوە بەر لەوەی بە ئێرانییەكان بڵێت، ئەوەشی پشت ڕاستی كردەوە كە هەندێك لەگەڵ ڕێككەوتنن و هەندێكیش لەگەڵ دەستپێكردنەوەی جەنگدان. هاوكات كەناڵی “سی بی ئێس” لەسەر زاری ترەمپ بڵاوی كردەوە “كە هەر دوو لا زۆر لە ئەنجامدانی ڕێككەوتن نزیك بوونەتەوە”.
