بە پاساوی هەوڵدان بۆ تێكدانی سەروەری عێراق وەزارەتی دەرەوەی ئەمریكا سزای بەسەر ژمارەیەك لایەن و گروپی عێراقیدا سەپاند. تۆمی پێگۆت جێگری وتەبێژی وەزارەتی دەرەوە لە نووسینێكیدا لە تۆڕی ئێكس دەڵێت: ئەمریكا هەوڵ دەدات ئەوپەڕی فشار بخاتە سەر ئێران، لەو چوارچێوەیەشدا سزای بەسەر گروپەكانی كەتیبەكانی حیزبوڵڵا و عەسائیب ئەهلی حەق كە بنكەكانیان لە عێراقە، سەپاندووە. ناوبراو ئاماژەی بەوەش كردووە، ئەو گروپانە كار بۆ تێكدانی سەروەری عێراق و لاوازكردنی ئابورییەكەی دەكەن و هێرش بۆ سەر كەس و بەرژەوەندییەكانی ئەمریكا لە تەواوی ڕۆژهەڵاتی ناوەڕاستدا ئەنجام دەدەن. ڕۆژی ڕابردوو وەزارەتی خەزێنەی ئەمریكا پاكێجێكی نوێی سزاكانی ڕاگەیاند، كە ژمارەیەك كەسایەتیی و بانك و كۆمپانیای عێراقی پەیوەست بە سوپای پاسداران و كەتیبەكانی حزبوڵڵای گرتبووەوە لە نێویاندا كۆمپانیای موهەندیس كە شادەماری ئابووری حەشدی شەعبییە. هەر لەو چوارچێوەیەشدا جۆو ویڵسۆن كۆنگرێسمانی كۆمارییەكانی ئەمریكا داوای لە ئیدارەكەی ترەمپ كرد “فەیلەقی بەدر و هادی عامری سەرۆكی و بانكی ڕافیدەینیش بخاتە بازنەی سزادراوەكانەوە”. لای خۆیەوە لیژنەی ئۆڵۆمپی عێراق ئەو هەواڵانەی ڕەت كردەوە كە گوایە (عەقیل موفتین) سەرۆكی لیژنەكە لە لیستی سزادراوەكاندایە.
