ئۆکرانیا لە هێرشێکی بەرفراوانی درۆنیدا، وێستگەیەکی سەرەکیی نەوت و بنکەیەکی دەریایی لە شاری سەنت پترسبۆرگی ڕووسیا کردە ئامانج. ڤۆلۆدیمیر زێلێنسکی، سەرۆکی ئۆکرانیا، ڕایگەیاند ئەو وێستگە نەوتییە بەشێکی گرنگە لە ژێرخانی ڕووسیا و داهاتەکەی بۆ پڕچەککردن و بەردەوامیی شەڕ بەکاردەهێنرێت. لە بەرانبەردا، ئەلێکساندەر بێگلۆڤ، پارێزگاری سەنت پترسبۆرگ، پشتڕاستی کردەوە کە شارەکەیان ڕووبەڕووی هێرشێکی بەرفراوانی فڕۆکەی بێفڕۆکەوان بووەتەوە و وێستگەکە کراوەتە ئامانج، بەڵام ئاماژەی پێ کرد کە ڕووداوەکە هیچ زیانێکی گیانیی لێ نەکەوتووەتەوە. لە ماوەی ڕابردوودا، کیێڤ هێرشە ئاسمانییەکانی بۆ سەر دامەزراوەکانی وزە لە قووڵایی خاکی ڕووسیادا چڕتر کردووەتەوە و پێی وایە ئەو دامەزراوانە ئامانجێکی ڕەوان، چونکە مۆسکۆ بۆ پشتیوانیکردنی جەنگەکەی بە توندی پشتی پێ بەستوون. بەپێی وتەی بەرپرسانی ئۆکرانیا، ئەم هێرشە یەک لە دوای یەکانە بوونەتە هۆی لەکارخستنی نزیکەی لە سەدا ٤٣ی توانای پاڵاوتنی نەوتی ڕووسیا و کەمبوونەوەی سەختی سووتەمەنی لێ کەوتووەتەوە، هەرچەندە تا ئێستا ئەم ئامارانە لەلایەن سەرچاوەی سەربەخۆوە پشتڕاست نەکراونەتەوە.