سەرۆكوەزیرانی عێراق ڕایگەیاند بنبڕكردنی گەندەڵی لە دەروازە سنوورییەكان كاری لە پێشینەی حكومەتە و دەبێت بكرێنە سیستەمی ئەلیكترۆنی. لە سەردانێكیدا بۆ دەستەی دەروازە سنوورییەكان عەلی فالح زەیدی، سەرۆكوەزیرانی عێراق ڕایگەیاند، ڕووبەڕووبوونەوەی گەندەڵی، قاچاخچێتی و فێڵكاری لە سنوورەكان كاری لەپێشینەی قۆناغی داهاتوو دەبێت. زەیدی ئاماژەی بەوە كرد، كە دەروازەكان ڕووكاری ئابووری، ئەمنی و سەروەری دەوڵەتن، بۆیە فەرمانی دا بە خێراكردنی پڕۆژەی بە ئەلیكترۆنیكردنی سەرجەم دەروازەكان و پێشكەشكردنی ڕاپۆرتی ڕۆژانەی داهاتەكان. هەروەها بڕیار درا دەروازەكان ببنە خاوەن دارایی سەربەخۆ، بە جۆرێك ڕسوماتی باج و گومرگ پێش گواستنەوەی پارەكان وەربگیرێت و بۆ پەرەپێدانی خودی دەروازەكان خەرج بكرێتەوە. لە بەرانبەردا، عومەر عەدنان وائیلی، سەرۆكی دەستەی دەروازەكان، پلانەكانی بۆ كاراكردنی سیستەمی “ئەسیكۆدا” و ڕێگریكردن لە دەروازە نایاساییەكان و قاچاخی ماددە هۆشبەرەكان خستە ڕوو. وائیلی ئاشكرای كرد كە بەهۆی بەكارهێنانی سیستەمی ئەلیكترۆنی بۆ چاودێری بارهەڵگرەكان، داهاتی گومرگی ئەمساڵ بە شێوەیەكی بەرچاو زیادی كردووە.