جێگر سەلێمان ساڵح
ئەگەر سەرۆک وەزیران مەسرور بارزانی بە هەموو ئەو دەسەڵاتە ڕەها و هێزەی کە لە کابینەکەیدا هەیبوو نەیتوانی کێشەی مووچە و بژێویی خەڵک چارەسەر بکات، ئیتر بە چ لۆژیکێک چاوەڕێ بکەین کە بە پێدانی دەسەڵاتی زیاتر و درێژکردنەوەی تەمەنی حکومەتەکەی ئەم قەیرانانە بنبڕ بکات؟ ڕاستییەکە ئەوەیە کە دەسەڵاتداران عادەتیان گرتووە بەردەوام شکستی حوکمڕانیی خۆیان بخەنە ئەستۆی ململانێ سیاسییەکان لەگەڵ بەغدا و وا نیشان بدەن کە ئەوان قوربانین. لە کاتێکدا مووچەخۆران بۆ چەندین مانگ لە چاوەڕوانیی پارەی ماندووبوونی خۆیاندان و بازاڕەکان ئیفلیج بوون، حکومەت بەردەوامە لە ناردنی نامەی ناڕەزایەتی بۆ دادگای فیدراڵی، وەک ئەوەی سکی خەڵک بە نامە و سکاڵای یاسایی تێر ببێت. ئەمە ئەو شانۆگەرییە بێزارکەرەیە کە تێیدا دەسەڵاتدارێک باس لە ئابوورییەکی بەهێز و پشتبەستن بە داهاتی ناوخۆ دەکات، کەچی لە واقیعدا حکومەتەکەی ناتوانێت تەنانەت مووچەی مانگێکی فەرمانبەرەکانیشی بەبێ خێر و سەدەقەی بەغدا دابین بکات. هەر بۆیە، کاتێک قەیرانەکە دەگاتە لوتکە و گەنجان لە بێکاریدا وڵات جێدەهێڵن، سەرۆک وەزیران دێتە سەر شاشەکان و دەڵێت کە مووچە نابێت بکرێتە کارتی فشاری سیاسی. بەڵام لە واقیعدا، خودی مانەوەی ئەم سیستەمە پشککارییە لەسەر بنەمای بە بارمتەگرتنی بژێویی خەڵک دروست بووە؛ چونکە نەبوونی مووچە باشترین ئامرازە بۆ بێدەنگکردنی کۆمەڵگا و سەرقاڵکردنیان بە کێشە سەرەتاییەکانی ژیانەوە، تا کەس نەپەرژێتە سەر پرسیارکردن لەسەر ئەوەی داهاتی نەوت و خاڵە سنوورییەکان چی لێدێت. ئەگەر حکومەت لە ماوەی ئەم چەند ساڵەدا نەیتوانیبێت ژێرخانێکی ئابووریی ئەوتۆ دروست بکات کە بەرگەی بڕینی بەشە بودجەی بەغدا بگرێت، ئەوا مانای وایە هەموو دروشمەکانی حکومەتی بەهێز و شەفاف تەنیا بۆ ڕازاندنەوەی مانشێتی ڕۆژنامە حیزبییەکان بووە و هیچی تر.