عەبدوباست عومەر حەمە
لە نەخشەی سیاسیی هەرێمی کوردستاندا، دەسەڵاتداران هەمیشە فێری ئەوە بوون یاری بە ناوی «ئۆپۆزسیۆن» بوبەن؛ حزبێک دروست دەکەن، یەکێکی تر دەکڕن، و سێیەمیان لە هۆڵەکانی پەرلەماندا بێدەنگ دەکەن. بەڵام کابووسە ڕاستەقینەکەی کابینەکەی مەسرور بارزانی و تەواوی نوخبەی فەقمرانی زۆنی زەرد و سەوز، سندوقەکانی دەنگدان یان هاوار و چەپڵەڕێزانی بڵندگۆ حزبییەکان نییە، بەڵکو «حافزە و بیرەوەریی کۆمەڵگەیە». تەواوی ستراتیژی حوکمڕانیی ئەوان لەسەر ئەو گریمانە بێشەرمانەیە دامەزراوە کە جەماوەر بە تێپەڕبوونی کات تووشی زەهایمەری سیاسی دەبێت—کە بەڵێنە فیردەوسییەکانی دوێنێ، مۆڵەتە بەسەرچووەکانی پار، و فەشەلە زنجیرەیییەکانی دەیەی ڕابردوو بە ئاسانی لەیاد دەکات کاتێک بە دروشمێکی نوێوە دێنەوە سەر شاشەکان.
ئەم پشت بەستنە بە «فەرامۆشکاریی خەڵک»، تاقە چەکی ڕژێمێکە کە هیچ دەستکەوتێکی کرداریی بۆ نیشاندان نییە. کاتێک ڕابەران بە بێباکیپۆشییەوە دێن و باسی «چاکسازیی ئایندە» دەکەن، تەنها بەو هیوایەن کە کەس بیر لە بەڵێنەکانی کارەبای ٢٤ کاتژمێری، بێکاریی گەنجان، و پاشەکەوتی مووچە نەکاتەوە کە ساڵانێکە وەک داغێک بە ناوچەوانی هاوڵاتییانەوە لکاوە. بەڵام ئەم تاکتیکە سنوورێکی هەیە؛ کاتێک تەمەنی حوکمڕانیی هەمان بنەماڵە و هەمان دەستەگەری دەگاتە زیاتر لە سێ دەیە، توانای مانۆڕدان و جیاکردنەوەی «سەرکردەکان» لە «ئەنجامی کردارەکانیان» بە تەواوەتی لەناو دەچێت. چیتر ناتوانرێت ڕابردوو یان دەستی دەرەکی بە تاوانبار بزانرێت، کاتێک تەواوی وێرانکارییەکە بە دەستی هەمان دەسەڵاتدارانی ئێستا ئەنجام دراوە.
کۆتایی ئەم ململانێیە دەروونییە، حەقیقەتێکی زۆر تاڵ و ڕووتمان بەڕوودا دەپەکێنێتەوە کە هیچ کۆنترۆڵێکی میدیایی ناتوانێت دەستکاری بکات: چەندە هەمان سەرکردەکان درێژە بە مانەوەیان لە دەسەڵاتدا بدەن، ئەوەندە جیاکردنەوەیان لە ئەنجامە کارەساتبارەکانی حوکمڕانییان مەحاڵتر دەبێت؛ حزبەکان دەکرێت ڕێکبکەون یان بێدەنگ ببن، بەڵام بیرەوەریی خەڵک تاقە ئۆپۆزسیۆنێکە کە نە دەکڕرێت و نە لەبیر دەکات.