“سندوقی نهێنییەكانی سوودانی” بە تۆمەتی گەندەڵی 20 تریلیۆن دینار دەستگیر كرا

هێزەكانی دژە تیرۆر لە بەغداد، سەرمایەدار نومەیر عوقابی نزیك لە سوودانییان بە تۆمەتی گەندەڵی دەستگیر كرد. سەرچاوەیەكی ئەمنی لە بەغدا ڕایگەیاند، هێزەكانی دژە تیرۆر لە ئۆپەراسیۆنێكی لەناكاو و نهێنیدا، نومەیر عوقابی خاوەنی كۆمەڵگەی “دەروازەی عێراق”یان دەستگیر كرد، كە بە “سندوقی نهێنییەكانی” محەمەد شیاع سوودانی، سەرۆكوەزیرانی پێشوو دادەنرێت، بەو پێیەی تۆمەتباری سەرەكییە لە دۆسیەكانی سپیكردنەوەی پارە و ئەنجامدانی وەبەرهێنانی وەهمی بە بڕی زیاتر لە 20 تریلیۆن دینار. بەوتەی سەرچاوەكە، دەستگیركردنی عوقابی مەترسییە بۆ سەر چەندین بەرپرسی باڵای حكومەتی ئێستا و پێشوو، چونكە چاوەڕوان دەكرێت ناوی چەندین كەسایەتیی باڵا لە دۆسیەكانی گەندەڵیدا ئاشكرا بكات. هێزە تایبەتەكەی ڕووبەڕووبوونەوەی گەندەڵكاران بە تەواوی نهێنییان لە كارەكانیاندا پاراستووە و تەنانەت زانیارییان بە بنكەكانی پۆلیسیش نەداوە، بۆ ئەوەی زانیارییەكان دزە نەكەن و تۆمەتباران ڕانەكەن. ئەم دەستگیركردنە وەك هەنگاوێكی گەورە بۆ هەڵوەشاندنەوەی تۆرە گەورەكانی گەندەڵی لە عێراقدا دەبینرێت كە پەیوەندییان بە بەرپرسە باڵاكانەوە هەیە.