دوای سەپاندنی لەسەدا ٥٠ی پێناسی گومرگی لە لایەن ئەمریکاوە بەسەر کەنەدا بە بەهای ٢٠ ملیار دۆلار، حکوومەتی کەنەدا ڕایگەیاند، ئەم کردەوەیە بێ وەڵام نامێنێتەوە. پێناسە گومرگییەکە لەسەدا ٥ی کۆی هەناردەی ساڵانەی کەنەدا بۆ ئەمریکا دەگرێتەوە و بەشێکی زۆر لە کەلوپەلەکان لەوانەش پێداویستی پزیشکی لە خۆ دەگرێت. لەم بارەیەوە نوێنەری بازرگانی ئەمریکا جیمیسیۆن گرێر ڕایگەیاند، کەنەدا ڕێککەوتن لەسەر لێکتێگەیشتنی بازرگانی لەنێوان هەردوو وڵاتی ڕەت کردووەتەوە. گرێر پێشنیازەکانی واشنتۆن’ی وەک پلانی دروست بۆ داهاتوو ناو هێنا و وتی، ئەم پێشنیازانە “هاوبەشی مێژوویی ئابووری و ئاسایشی نیشتمانی” ن. لە لایەکی دیکەوە، سەرۆکوەزیرانی کەنەدا مارک کارنەی بەرانبەر بەو کردەوەیەی ئەمریکا وتی، ئەمریکا پێناسی گومرگی بەسەر یەکێک لە نزیکترین هاوپەیمانانی خۆیدا سەپاندووە و کەنەدا دەزانێت کە چیدیکه ناتوانێ بگەڕێتەوە بۆ پەیوەندییەکانی ڕابردوو. کارنەی هەروەها ڕایگەیاند، دانوستان لەگەڵ ئەمریکا بە هۆی گۆڕانکارییەکانی دوایین سات لە مەرجەکانی ئەمریکا، هەڵپەسێردرا. سەرۆکوەزیرانی کەنەدا ئەو گۆڕانکارییانەی “نادادپەروەرانە و لە ڕووی ئابوورییەوە نەگونجاو” لەقەڵەم دا و وتیشی، کەنەدا بۆ پشتگیری لە کرێکاران و پیشەکانی خۆی، وەڵامی ئەم پێناسانە دەداتەوە.