دیاری فەرەیدون کەریم
بێگومان هەر یەکێک لە ئێمەی پیاوان ئەگەر لاماندابێت بۆ wcی مزگەوتەکانی کوردستان چاومان بە نوسینی سەر دیوار و دەرگای سەرئاوەکان کەوتوە.
دێڕی سەیر و سەمەرە و دەستەواژەی سیاسی و ڕەخنەی توند و هەندێ جار تا ئاستی جوێن نوسین دەنوسرێن لەسەر دەرگا و دیواری سەرئاوەکان.
ئەمە بابەتێکی پێکەنیناوی نیە ، بەڵکو بابەت و دیاردەیەکە کە ناکرێ هەڵویستەی لەسەر نەکرێت، ناکرێ بیری لێ نەکەینەوە ناکرێ قسەی لەسەر نەکەین.
ئەوە نیشانەی ئەوەیە کە کوردستان و عێراق ڕێک وەک زیندانێکی گەورەیە بۆ گەنجان و ئازادیخوازان و مرۆڤە داخ لەدڵەکان لەبەرانبەر سیستم و دەسەڵات و میلیشیاکاندا.
ڕێک زیندانی ئەبو غرێب و ئاکرێ و سوسێ و ئەمنەسورەکەی جارانە کە زیندانیەکان لەسەر دیوار و دەرگاکان سەدان دێڕیان دەنوسی و لەدوای لەسێدارەدان و کوشتنیان نوسینەکانیان لێ بەجێدەما.
ئەو نوسینانەی سەر دیوار و دەرگای زیندانەکان هەمان ئەو نوسینانەن ئێستا لەسەر دیوار و دەرگای سەرئاوەکان دەنوسرێت، بەڵام زیندانەکان جیاوازن ئەوانەی ئێستا لەنێو زیندانێکی زۆر گەورەدان کە قەبارەکەی عێراق و کوردستانە ، زیندانیەکانی پێشوو قەبارەی زیندانەکەیان ئەمنەسورەکە و ابوغرێب و سوسێ و ئاکرێیە.
بەڕاستی هەڵگرتنی قەڵەم و جافێک و چون بۆ سەرئاوەکان بۆ نوسین لەسەر دەرگا و دیوارێک هەروا شێتانە و نیشانەی بێ ئیشی نیە ، بەڵکو نیشانەی ئەو ستەم و زوڵمەیە کە دەسەڵاتی حیزب و میلیشیا ئەنجامی دەدات و بوە بە داخ و ئازارێکی قوڵ لە هەناوی گەنجان و خەڵکی داخ لەدڵدا.
ئەمەوێ ئەوە بڵێم کە ئێمەی گەنجانی تاراوگە باشترین چانسمان لەژیاندا هەیە چونکە لە مەملەکەت و وڵاتانێکداین کەشێکی ئازادی تێدا فەراهەمە تا نوسینی سەرئاوەکان بخەینە سەر پۆستەرەکان و لە سوشیال میدیا و تەواوی شوێنەکانی تردا بڵاوی کەینەوە کە دەیکەین.
ئەوە باشترین دەرفەتە کە ئێمە هەمانە تیایدا ئازادانە دەنگ بەڕوی زوڵم و ستەمدابەرز دەکەینەوە.
کەواتە ئەم دەرفەتە هێندە کاریگەرە تا ڕادەی گۆڕین و ئاڕاستەکردنی دەسەڵاتی سیاسی لەکوردستان و عێراق دەتوانین کار بکەین و ڕیشەی ستەم وشک بکەین و داری ئازادی بچێنین و مەملەکەتێکی ئازاد و دیموکرات بئافرێنین بۆ گەلی ستەمدیدەمان.
چالاکوان و ئەندامی ڕێکخراوی داکۆک