لە درێژەی کاردانەوەکانی چالاکییەکەی ڕێکخراوی داکۆک کە بەبۆنەی ١٢٨ ەمین ساڵیادی ڕۆژنامەگەری کوردییەوە لە بریتانیا ڕێکخرا، هەنگاوێکی نوێ بۆ بە نێودەوڵەتیکردنی کەیسی ڕۆژنامەنووسە زیندانیکراوەکانی باشووری کوردستان نرا. لەم ڕووداوەدا کە ژمارەیەکی بەرچاو لە چالاکوانان و ڕەوەندی کوردی لە شارەکانی لەندەن و مانچێستەرەوە تێیدا بەشداربوون، داکۆک تیشکی خستە سەر ئامادەکردنی دۆسیەی یاسایی دژی دەسەڵاتی هەرێم. چالاکییەکە، کە دروشمی “دوای ١٢٨ ساڵ، لە خەباتی ڕزگارییەوە بۆ زیندانەکانی دەسەڵاتی هەرێمی کوردستان”ی هەڵگرتبوو، بووە سەکۆیەک بۆ کۆکردنەوەی بەڵگە و شایەتحاڵی لەسەر دەستگیرکردن و تیرۆرکردنی ڕۆژنامەنووسان لەلایەن هێزە ئەمنییەکانەوە.
وێنەى بەشداربوان لە شارەکانى لەندەن و مانچستەر
وێنەکە لە فەیسبووکى فەرمى ڕیکخراوى داکۆک وەرگیراوە
ئەندامانی داکۆک لە میانەی پێشکەشکردنی ڕاپۆرتەکانیاندا، بە توندی ئیدانەی ئەو ڕەفتارانەیان کرد کە ژیانی چالاکوانانی میدیاییان خستووەتە مەترسییەوە و وایانکردووە کوردستان ببێتە ژینگەیەکی کوشندە بۆ کاری ڕۆژنامەوانی. بەشداربووان لە بریتانیاوە داوایان کرد کە ئەم پێشێلکارییانە لە ڕێگەی ڕێکخراوە جیهانییەکانی تایبەت بە مافی مرۆڤەوە فشارێکی گەورەتر دروست بکەن. ئەوان جەختیان لەوە کردەوە کە ئەمە تەنها پرسێکی ناوخۆیی نییە، بەڵکو پێشێلکارییەکی ئاشکرای پەیماننامە نێودەوڵەتییەکانە و پێویستی بە وەڵامدانەوەی خێرا هەیە. هەواڵی ئەم گردبوونەوەیە نیشانی دەدات کە داکۆک تەنها بە بەیاننامە ناوەستێت، بەڵکو کار دەکات بۆ ئەوەی کۆمەڵگای نێودەوڵەتی بێتە سەر خەت و سنوورێک بۆ ئەم زوڵمە دابنێت.